ВИДЕО | Полувреме од соништата: Мбапе, Хакими и Асенсио го „уништија“ Лион
Фудбалерите на ПСЖ убедливо го совладаа Лион со 1:4. на гостински терен во дерби натпреварот од четвртото коло на француската „Лига 1“.
На шампионот на Франција неочекувано лесно му беше да дојде до бодови на жешко гостување. Веќе на стартот од мечот груба грешка направи капитенот на домашните Толисо, кој ја загуби топката во шеснаесетникот и во таа прилика го фаулираше Уругваецот Мануел Угарте. Судијата покажа на белата точка, а Килијан Мбапе сигурно го изведе најстрогиот пенал – 0:1.
Во 21 минута веќе беше 0:2, Усман Дембеле помина од десната страна, шутираше, голманот Лопез кратко одбрани, а на вистинското место се најде Ахраф Хакими. Истиот играч ја погоди пречката во 31 минута, а седум минути подоцна Марко Асенсио излезе сам пред голманот на Лион и го постигна третиот гол.
Во втората минута од судиското надополнување на првиот дел, Килијан Мбапе побегна од одбраната на Лион и го постигна вториот гол на натпреварот, вкупно четврти за ПСЖ – 0:4! Полувреме од соништата за парижаните.
Гостите го намалија темпото во вториот дел, што Лион го искористи и постигна утешен гол од пенал во 74 минута. Стрелец беше капитенот Толисо за поставување на конечниот резултат – 1:4.