Пар таканаречени „премиум“ дињи од јапонскиот остров Хокаидо се продадени вчера на аукција за рекордни 5,8 милиони јени, што одговара на износот од околу 31.000 евра.

Со тоа е урнат претходниот рекорд од пет милиони јени од 2019 година, пренесе „Кјодо“.

На аукцијата, дињите ги купила компанијата „Футами Сеико“, трговец на големо со овошје и зеленчук, која потоа ги препродала на „Кеио стор“, а која планира да ги изложи во еден од своите супермаркети во Токио до недела.

„Се надевам дека луѓето во Токио ќе уживаат во овие дињи од Хокаидо“, рекол Хироказу Окубо, раководител на продажба во „Футами Сеико“, кој бил вклучен во успешната понуда на пазарот на големо во Сапоро.

Познати по своето сочно портокалово месо и сладост, дињите од сортата Јубари често се испраќаат како подароци во Јапонија, наведува „Кјодо“.

Локалните земјоделци планираат да испратат 3.086 тони дињи во вредност од околу 2,12 милијарди јени оваа година, а врвот на бербата се очекува во јуни и јули.

Премиум овошјето често достигнува многу високи цени на првите аукции во Јапонија, а купувачите ги користат успешните понуди за промотивни цели.