Македонскиот младински репрезентативец Матеј Гаштаров ја продолжи соработката со Црвена звезда, откако стави потпис на нов тригодишен договор со белградскиот гигант.

Младиот фудбалер летово ги мина подготовките со првиот тим и со своите настапи успеа да го привлече вниманието на стручниот штаб, по што клубот реши да му укаже дополнителна доверба со нов договор.

По потпишувањето, Гаштаров доби и посебно изненадување од медија тимот на Црвена звезда. Преку видео-повик му честитаа две македонски легенди на клубот – Дарко Панчев и Илија Најдоски, кои му посакаа успешна кариера, многу трофеи и што поскоро да се избори за место во првиот тим.

Панчев и Најдоски беа дел од славната генерација на Црвена звезда која во 1991 година ја освои европската и светската титула.

Гаштаров е член на белградскиот клуб веќе две години, а сезонава направи уште еден чекор напред кон сениорскиот состав. За време на летните подготовки се запиша и меѓу стрелците, дополнително потврдувајќи дека сериозно конкурира за место во првиот тим.

Матеј Гаштаров потпиша нов договор со Црвена звезда