Министерот за односи меѓу заедниците, Иван Стоилковиќ, објави снимка на која, според него, се гледа канцеларија во неговото министерство, онака како што ја оставиле службеници кои во неа работеле, но вчера биле отпуштени.

Со објавата Стоилковиќ одговори на нападите од опозициската Демократска унија за интеграција (ДУИ), која претходно обвини за дискриминација поради тоа што од Министерството за односи меѓу заедниците се отпуштени „седуммина Албанци“.

На видеото се гледа неуредна канцеларија, на чиј под има импровизиран кревет.

„Ова е канцеларијата во Министерството за односи меѓу заедниците, инаку претворена во ова што го гледате, во која „работеа“ вчера отпуштените службеници кои, по некоја случајност се од ДУИ. По документирањето на состојбата, тие се испратени да си спијат дома. Толку!“, пишува Стоилковиќ.

Од ДУИ денеска отпуштањето на седумтемина службеници го оценија како скандалозно.

„Оваа одлука претставува директен удар врз принципите на еднаквост, соживот и правична застапеност и не може да се оправда со невистинити и навредливи изговори за јавноста, како што е тврдењето за таканаречена „дисциплинска мерка“. Во услови кога на вработените им се ускратени најосновните услови за работа – функционални канцеларии, столчиња, техничка опрема и конкретни работни задачи – секоја ваква мерка претставува административна фарса и доказ за однапред умислена дискриминаторска намера“, наведоа од партијата на Али Ахмети.