Еден од најдобрите футсал играчи на сите времиња, Португалецот Рикардо Филипе да Силва Брага, попознат како Рикардињо (39), ја заврши својата кариера.

Тој ја објави својата одлука на прес-конференција на Португалската фудбалска федерација (ФПФ) во Оеирас.

– Тоа беше најтешката одлука што ја донесов во мојот живот. Моето тело и ум рекоа дека е доста. Подобро е да го напуштиш спортот пред спортот да те напушти – изјави Рикардињо за веб-страницата на ФПФ.

Тој е прогласен за најдобар футсал играч во светот рекордни шест пати од специјализираниот портал Футсал Планет. Ја започна својата кариера во Мирамар, се прослави во Бенфика, а подоцна играше за Нагоја Оушнс (Јапонија), ЦСКА Москва (Русија), Интер Мовистар (Шпанија), АКЦС (Франција), Пендекар јунајтед (Индонезија), Рига (Летонија) и Екосити Генцано (Италија), освојувајќи 43 трофеи, вклучувајќи три титули во Лигата на шампионите.

Тој има 188 настапи за португалската репрезентација и постигна 142 гола, освојувајќи го Светското првенство (2021) и Европското првенство (2018).

– Мојот сон отсекогаш бил да бидам амбасадор на овој спорт, а за мене да бидам амбасадор значи да можам да го донесам футсалот во сите делови на светот – рече Рикардињо.