Во заливот Џервис во Австралија, морската вода повремено се осветлува со интензивна сина светлина, создавајќи впечаток дека брановите се исполнети со илјадници светкави ѕвезди. Но, како е можно морето да свети во текот на ноќта?

Одговорот се крие во природен феномен познат како биолуминисценција, кој го предизвикуваат микроскопски организми наречени динофлагелати. Овие ситни морски суштества реагираат на секое движење на водата, па дури и чекорите на човек во плиткото се доволни за накратко да се појават блесоци од сина светлина. Така настанува таканаречениот „син бран“, кој брегот го претвора во глетка што остава без здив.

@joshg_photos Bioluminescence compilation! I decided to put together some of my favorite clips that have filmed over the last few years in Florida! Nature will never cease to amaze me. What’s your favorite shot from this edit? 📍Merritt Island National Wildlife Refuge and Indian River Lagoon, Florida #bioluminescence #moana #ocean #nature #glowing ♬ original sound – xavier

Зад оваа необична појава стои хемиска реакција што се одвива во самите организми. Кога динофлагелатите ќе бидат вознемирени, тие ослободуваат енергија во вид на светлина наместо во вид на топлина. Сепак, интензитетот на светкањето не е секогаш ист, бидејќи зависи од температурата на морската вода и од низа други природни услови.

Најповолниот период за набљудување на биолуминисценцијата најчесто е од крајот на летото до почетокот на есента. Потоплата вода, како и хранливите материи што во морето ги носат дождовите, овозможуваат планктонот побрзо да се размножува. Но, дури и тогаш нема гаранција дека ќе го видите овој феномен, затоа што природата сама одредува кога ќе го приреди овој светлосен спектакл.

Покрај заливот Џервис во Австралија, меѓу најпознатите места каде што може да се доживее оваа појава се заливот Москито во Порторико, островот Ваду на Малдивите, како и лагуната Индијан Ривер во американската сојузна држава Флорида. Биолуминисценцијата може да се забележи и на бројни други крајбрежја во Јапонија, Тајван, Тајланд и Нов Зеланд.

Оние што сакаат да го искусат овој редок природен феномен треба да изберат ноќ со целосна темнина, по можност кога нема месечина. Доволно е да ја потопите раката во морето или да прошетате по влажниот песок и околу вас ќе се појават безброј ситни сини светла.

Доколку влезете во морето, овие микроскопски организми привремено ќе се задржат на вашето тело, па ќе изгледа како да светите, како сцена од научнофантастичен филм. Нема причина за загриженост, бидејќи динофлагелатите не се опасни за луѓето. Напротив, тие овозможуваат несекојдневно искуство што долго останува во сеќавање.

НАСА сними спектакл — зошто Црното Море ја менува бојата и станува сѐ потиркизно?