Емоционалната интелигенција често се споменува како важна особина, но ретко се објаснува што навистина значи во секојдневниот живот. Таа не се сведува само на смиреност или љубезност, туку претставува способност да ги препознаеме сопствените чувства, да ги разбереме емоциите на другите и соодветно да реагираме во различни ситуации, пишува „Вајс“.

Концептот за емоционална интелигенција во 1990 година го поставија психолозите Питер Саловеј и Џон Мајер, а подоцна психологот Даниел Голман го разви моделот што денес е најшироко прифатен. Според него, емоционалната интелигенција се темели на самосвест, самоконтрола, емпатија, мотивација и социјални вештини.

Истражувањата покажуваат дека луѓето со висока емоционална интелигенција полесно градат здрави односи, подобро се справуваат со стресот и почесто се успешни во работната средина. Ова се пет навики што најчесто ги издвојуваат.

1. Не го одложуваат извинувањето

Луѓето со развиена емоционална интелигенција брзо препознаваат кога направиле грешка и не чекаат некој друг да им укаже на неа.

Без разлика дали ненамерно повредиле нечии чувства, некого не сослушале доволно внимателно или постапиле непромислено, тие чувствуваат потреба да ја исправат ситуацијата. Нивното извинување е искрено и не е проследено со оправдувања или обиди да ја намалат сопствената одговорност.

2. Не реагираат веднаш, туку си даваат време

Наместо импулсивно да возвратат кога ќе се најдат во конфликт, тие најпрво прават кратка пауза.

Тоа им овозможува да размислат што навистина се случува, да ја согледаат и другата страна и дури потоа да одговорат. На тој начин избегнуваат непотребни расправии и полесно доаѓаат до решение.

3. Искрено се интересираат за чувствата на другите

Емпатијата е една од најважните карактеристики на емоционално интелигентните луѓе.

Тие не претпоставуваат како се чувствуваат другите, туку се обидуваат навистина да ги разберат. Благодарение на тоа полесно ги препознаваат емоциите во својата околина, подобро ги решаваат конфликтите и создаваат посилни и подолготрајни односи.

4. Поставуваат граници наместо да се одмаздуваат

Кога некој ќе ја злоупотреби нивната доверба или добрина, тие не возвраќаат со скриена лутина или пасивна агресија.

Наместо тоа, ги преиспитуваат односите и поставуваат јасни граници. Ако некој постојано ги искористува, едноставно го менуваат начинот на кој комуницираат со него, без потреба да го казнуваат или намерно да му наштетат.

5. Знаат што навистина чувствуваат

Една од најважните способности е точно да ги препознаат и именуваат сопствените емоции.

Наместо само да кажат дека се под стрес или вознемирени, тие знаат дали чувствуваат лутина, разочараност, завист, срам или страв. Кога човек јасно разбира што чувствува, многу полесно може да ги контролира своите реакции и да не ги пренесува негативните емоции врз другите.

Емоционалната интелигенција не значи совршенство

И луѓето со висока емоционална интелигенција понекогаш губат трпение, носат погрешни одлуки или реагираат несоодветно.

Разликата е во тоа што тие брзо ги препознаваат своите грешки, преземаат одговорност и се обидуваат да ги исправат, наместо да се преправаат дека ништо не се случило.

6 фрази што ги користат емоционално незрелите луѓе: Во напад на бес, тие несвесно отркиваат сè