Што го прави едно лице привлечно? Ново научно истражување, во кое биле анализирани повеќе од 600 лица со помош на 3Д-скенирање, се обидело да даде одговор на ова прашање. Резултатите покажуваат дека одредени црти на лицето почесто се доживуваат како привлечни, а истражувачите велат дека токму хармонијата на целокупниот изглед има клучна улога во првиот впечаток.

Според истражувањето, највисоки оценки за привлечност добиле жените со потенко лице, пополни усни и поизразени црти. Кај мажите, најпривлечни биле оние со нагласена вилица, изразена брада и поаголен профил.

Во истражувањето учествувале шест независни оценувачи, тројца мажи и три жени, кои секој 3Д-модел на лице го оценувале на скала од 0 до 100.

Авторот на студијата, Георгиос Канавакис од Универзитетот во Атина, за „ПсајПост“ изјавил дека физичката привлечност има значително влијание врз секојдневните човечки интеракции.

„Физичката привлечност влијае на многу аспекти од нашиот живот – од првите впечатоци и новите познанства до деловните можности и романтичните врски“, истакнал Канавакис.

Тој додава дека, иако често се вели дека убавината е целосно субјективна, бројни истражувања покажуваат дека постои изненадувачки висок степен на согласност меѓу луѓето околу тоа кои лица ги сметаат за привлечни.

Според него, привлечноста не зависи од една „совршена“ црта, како носот или брадата, туку од складот на повеќе карактеристики кои заедно создаваат хармоничен изглед.

За полесно да ги илустрираат резултатите, истражувачите посочиле и неколку познати личности чии црти на лицето одговараат на карактеристиките што најчесто биле оценувани како привлечни.

Кај жените како примери се наведени актерката Марго Роби и манекенката Елса Хоск, а кај мажите британскиот модел Дејвид Ганди и актерот Хенри Кавил.

Истражувањето потсетува и дека првиот впечаток за една личност се формира за само неколку секунди. Освен возраста и полот, луѓето уште при првата средба, свесно или несвесно, создаваат мислење за доверливоста, компетентноста и интелигенцијата на соговорникот.

Воедно се посочува и на резултати од претходно истражување, според кои женските лица во просек добиваат повисоки оценки за привлечност од машките. Особено интересно е што жените ги оценуваат другите жени како попривлечни отколку што тоа го прават мажите, додека машките лица добиле слични оценки од двата пола, но во просек биле оценети пониско.