Фудбалот често пати знае да биде причина за необични приказни, а една таква доаѓа од Македонија и носи искрена навивачка страст кон играта.

Љубомир Димовски, вистински фудбалски вљубеник, веќе со години патува низ Европа и собира незаборавни моменти. Зад себе има импресивни 211 гледани натпревари, на 80 стадиони во 32 земји што се навистина бројки за респект.

Последните десет дена Димовски беше на „островска“ авантура, а како кулминација стигна дуелот меѓу Ренџерс и Брага во Лигата на Европа. Иако претходно чекорел по легендарните „Енфилд“ и „Олд Трафорд“, токму атмосферата на „Ајброкс“ ќе остане врежана во неговите сеќавања, а заслуги за тоа има и македонскиот напаѓач Бојан Миовски.

 

View this post on Instagram

 

A post shared by Ljubomir Dimovski (@ljubomirdimovski)

Македонскиот репрезентативец го забележал својот сонародник на трибините и со едноставен, но голем гест му го разубавил денот: му пришол, се фотографирал со него, а потоа му го подарил дресот од натпреварот. Мал знак на внимание од страна на Миовски, но спомен што Димовски ќе го носи со себе уште долго.

Ова беше втора „островска“ тура на Димовски, во која успеа да гледа осум натпревари за само десет дена. Почна со тешката вечер за Македонија во Кардиф против Велс, а потоа ги следеше дуелите: Престон – Блекбурн 1-2, Бристол – Свонси 3-0, Шефилд Венсдеј – Шефилд Јунајтед 0-3, Манчестер Јунајтед – Евертон 0-1, Манчестер Сити – Баер Леверкузен 0-2, Ливерпул – ПСВ 1-4 и Ренџерс – Брага 1-1.

Преземено од: Спорт.ком.мк