Љубителите на култната пародија „Голиот пиштол“ („The Naked Gun“) конечно добија прв поглед кон најновото продолжение, во кое главната улога ја презема Лијам Нисон. Тој ќе го толкува ликот на Френк Дребин Џуниор – синот на славниот детектив, кој во оригиналните филмови го глумеше незаборавниот Лесли Нилсен.

Првиот трејлер беше прикажан на годишната конвенција Синемакон, каде беше откриена сцена од полициска акција по грабеж во банка. Во необична пресвртница, мало девојче со огромна лизалка влегува во банката, и покрај предупредувањата од полицијата.

„Што сакаш, малечка?“, ја прашува еден од разбојниците. Но, наместо одговор, девојчето ја симнува маската и се открива дека зад неа стои самиот Лијам Нисон. Неговата лизалка се претвора во смртоносно оружје, а на крајот од трејлерот, актерот се појавува во комична сцена облечен во сукња, под која му се гледаат гаќичките – хумор препознатлив за оваа филмска франшиза.

Новиот „Голиот пиштол“ го режира Акива Шафер, а продуценти се Сет Макфарлејн и Ерика Хагинс. Покрај Нисон, во филмот ќе се појават и Памела Андерсон, како и Дени Хјустон, пренесува „Гардијан“.

Оригиналниот „Голиот пиштол“ од 1988 година, во кој главниот лик го глумеше Лесли Нилсен, беше огромен хит, заработувајќи 140 милиони долари и добивајќи одлични критики. По успехот на првиот филм, беа снимени уште две продолженија.

Студиото „Парамаунт“ од 2013 година прави обиди за ново поглавје на франшизата. Првично се разгледувала можноста улогата на Френк Дребин да му припадне на Ед Хелмс, но таа идеја била напуштена. Во 2021 година, Сет Макфарлејн потврди дека тој ќе работи на проектот, што ги разгоре надежите кај обожавателите на овој култен хумористичен серијал.

Новото продолжение на Гол пиштол се очекува да пристигне во кината во август оваа година.

ФОТО | Лијам Нисон по 13 години тага по сопругата, конечно се заљуби: Арно ама…