Северна Кореја соопшти дека завршила нова станбена населба во Пјонгјанг за семејствата на севернокорејските војници убиени борејќи се заедно со руските сили во Украина, што е најновиот обид на лидерот Ким Џонг Ун да им оддаде почит на загинатите во војната.

Фотографиите од државните медиуми го покажуваат Ким како шета низ новата улица – наречена улица Саепјол – и ги посетува домовите на некои од семејствата со својата сè попозната ќерка, за која се верува дека се вика Ким Џу-ае, додека ветува дека ќе им се оддолжи на „младите маченици“ кои „се жртвувале за својата татковина“, пренесува Гардијан.

Северна Кореја испрати илјадници војници да се борат заедно со руските сили откако Москва ја нападна Украина пред речиси четири години, според јужнокорејските и западните разузнавачки агенции. Сеул вели дека најмалку 2.000 војници се убиени.

„Пред нивната смрт, херојските маченици требало да си ги замислат во умот своите сакани семејства како живеат во земја која е сè уште просперитетна“, рече Ким во говорот во неделата на инаугурацијата на новата улица, според КЦНА.

Фотографиите објавени од агенцијата го покажуваат севернокорејскиот лидер како ги посетува новите резиденции, со својата ќерка Ким Џу-ае покрај него.

Јужнокорејската разузнавачка служба минатата недела соопшти дека е јасно дека тинејџерката е „назначена за наследничка“ на раководството, наведувајќи го нејзиното учество во настани од висок профил со нејзиниот татко.

Посетата доаѓа пред најголемиот политички настан во Пјонгјанг, партискиот конгрес, кој се очекува да се одржи подоцна овој месец, иако точен датум сè уште не е објавен.

Се очекува вниманието да биде насочено кон насоките на надворешната и внатрешната политика на Ким Џонг-ун, како и кон можната официјална титула за Џу-ае во рамките на партијата.

Времето на инаугурацијата на улицата е „внимателно осмислен политички маневар за да се оправда распоредувањето на трупи“ пред партискиот конгрес, изјави за АФП Хонг Мин, аналитичар во Корејскиот институт за национално обединување.

„Ова ни овозможува да видиме дека државата нуди конкретна отштета на семејствата на војниците кои паднаа во битка (…) на симболичен настан“, истакна тој.

Според аналитичарите, во замена за испраќање војници, Русија ѝ испраќа на Северна Кореја економска помош, воени технологии, како и залихи од храна и енергија.

Ким Џонг Ун ќе ја именува ќерка си за свој наследник