ВИДЕО: Кари ги врати „воините“ во игра во големото НБА финале
Голден Стејт вориорс предводен од Стеф Кари успеа да го совлада Бостон селтикс со 107:97 и да израмни на 2:2 во победи во големото финале во НБА лигата.
Победникот беше решен во последните четири минути во кои кошаркарите на Бостон влегоа со предност од 94:93 по што на сцена стапија „воините“. Прво Клеј Томпсон постигна тројка за водство од 95:94, а потоа погоди и Кари за 97:94.
Во наредните две минути ниту една екипа не успеа да постигне поени, а тој период го прекина Кари со тројка за водство на Голден Стејт од 100:94. Бостон намали преку Хорфорд, но Луни возврати, а точка на натпреварот стави Стеф Кари со погодени пет слободни фрлања по ред.
Кари беше најпрецизен на натпреварот со 43 постигнати поени, а имаше и 10 скока. Томпсон даде 18, а Вигинс 17 поени.
Во редовите на Бостон, Џејсон Тејтум имаше дабл-дабл од 23 поени и 11 скока, додека Џејлен Браун постигна 21 поен.
Следниот натпревар од големото финале се игра во ноќта меѓу понеделник и вторник во три часот по полноќ, а домаќини се „воините“.