Дукаѓини го освои Купот на Косово откако во драматично и тензично финале славеше над Феризај со 2-1, во натпревар што беше проследен со бројни инциденти и нервоза на теренот, а беше забележан и инцидент сличен како и во битката за трофејот од македонскиот куп помеѓу Силекс и Шкендија.

Незадоволството кај фудбалерите и стручниот штаб на Феризај кулминираше поради судиските одлуки, па во еден момент тие демонстративно го напуштија теренот. Претходно, натпреварот беше прекинуван и поради турканици и расправии меѓу играчите, а судиите со мака успеаја да го приведат мечот кон крајот.

Дополнителен хаос следуваше и по последниот свиреж. Револтирани од случувањата, фудбалерите на Феризај, по кратка комуникација со своите навивачи, одбија да ги примат сребрените медали и веднаш се упатија кон соблекувалната, повторувајќи го потегот што ден претходно го направија и играчите на Шкендија.