Издавачката куќа „Темплум“ најавува нови изданија за деца, со намера да придонесе за литературата за деца на македонски јазик и потсетување на нашите подзаборавени писатели на детската книжевност.

„Сакавме да придонесеме за целокупната книжевност, која на некој начин, почива врз книжевноста за деца, а таа е темелна, почива врз фолклорот што пак е темел на книжевноста и на целата култура. Она што е актуелно во нашата продукција е новата едиција „Старо купувам“ во која постари и важни текстови за деца, главно од македонски автори, кои се занемарени и подзаборавени се обидуваме да им дадеме нова енергија со нови илустрации од современи, талентирани ликовни уметници, графички дизајнери, илустратори. И утре ќе имаме промоција на првата книга од таа едиција „Споменик од песни“ – избор песни од Видое Подгорец, еден од најважните македонски автори за деца, извонредно илустрирани од Ване Костуранов, изјави денеска во Утрински брифинг, Никола Гелевски.

Тој најави книжевен настан а деца (и возрасни) „Фини деца со сликовници“ што ќе се одржи во четврток, на 1 јули, во МКЦ во Скопје и на 3 јули во Градскиот парк во Струмица. Настанот ќе започне со промоција на сликовницата „Споменик од песни“ – избор песни од Видое Подгорец, потоа ќе се промовира книгата „Девет преобразби во чудната шума“ од Пандалф Вулкански, Во 20 часот ќе се одржи промоција на сликовницата „Морис и фустанот со боја на мандарина“ од канадските авторки Кристин Балдачино и Изабел Маланфан. Премиерно ќе биде прикажана кратка анимирана видео сликовница според книгата. Освен промоции ќе има кретаивна работилница за деца, музичка програма и саемче на книги за деца.