Ема Хеминг Вилис, сопругата на холивудскиот актер Брус Вилис, во гостувањето во подкастот „The Bossticks“ зборуваше за неговата здравствена состојба и појасни една од најчестите заблуди поврзани со фронтотемпоралната деменција (ФТД), болеста од која боледува славниот актер, пишува „Пејџ Сикс“.

Таа објасни дека оваа специфична деменција не е примарно поврзана со губење на паметењето. Фронтотемпоралната деменција има три различни варијанти, а кај Брус таа влијае на говорот и комуникацијата, додека другите две форми можат да предизвикаат промени во однесувањето или проблеми со движењето.

Ема нагласи дека кај него се работи за нарушување на фронталниот и темпоралниот дел од мозокот, а не за губење на сè уште постоечките спомени. Брус нема Алцхајмерова болест и тој сè уште ги препознава сите членови на семејството, вклучувајќи ги неа и неговите пет ќерки.

Семејството на Вилис за првпат јавно проговори за неговото здравје во март 2022 година, кога беше објавено дека тој се повлекува од актерството поради афазија. Една година подоцна пристигна и точната дијагноза за ФТД.

Иако соочувањето со болеста е болно, семејството тогаш соопшти дека чувствува олеснување што конечно има јасна дијагноза за оваа сурова состојба за која во моментов нема лек. Ема денес е целосно посветена на Брус и активно работи на подигање на јавната свест за деменцијата, нудејќи им поддршка на сите семејства кои минуваат низ истото.

ВИДЕО | Ема Хеминг проговори за најтешката одлука во нејзиниот живот: „Преселбата на Брус Вилис во дом беше неопходна“

ВИДЕО | Деменцијата ја откри понежната страна на Брус Вилис – ќерката Румер проговори за состојбата на татко ѝ