Алексија Путељас по 14 години ја завршува својата ера во Барселона, а каталонскиот клуб најави дека денеска ќе ѝ приреди свечено збогување на „Камп Ноу“.

Барселона соопшти дека сакаат да ѝ оддадат признание за сè што направила низ годините, истакнувајќи дека Путељас била лидер и инспирација и на теренот и надвор од него, како и една од најзаслужните личности за подемот на женскиот фудбал во Шпанија.

32-годишната фудбалерка минатиот викенд уште еднаш испиша историја со тимот, помагајќи ѝ на Барселона да ја освои четвртата титула во женската Лига на шампиони во последните шест сезони.

Путељас пристигна во Барселона во 2012 година од Леванте како 18-годишна надеж, а зад себе остава импресивна статистика со 507 настапи, што е втор најдобар учинок во историјата на клубот, како и рекордни 232 постигнати голови.

Во дресот на Барселона освои дури 38 трофеи, меѓу кои четири европски круни и 10 шампионски титули во Шпанија, со што се вбројува меѓу најголемите легенди на клубот.