Заврши една од најголемите трансфер саги ова лето, репрезентативецот на Англија Деклан Рајс доаѓа во Арсенал, потврди неговиот поранешен клуб Вест хем.

Рајс ќе биде најскапиот англиски фудбалер на сите времиња, Вест хем ќе добие 117 милиони евра фиксни и уште шест милиони преку бонуси за овој трансфер.

„Чеканите“ на својата интернет страница потврдија дека е постигнат договор и дека играчот од средниот ред кариерата ќе ја продолжи на „Емирати“.

– Жал ми е што Деклан нè напушта, но верувам дека сите во клубот се горди на улогата што ја одиграа во неговиот пат од нашата академија да стане најскапиот англиски фудбалер. Сакам да им порачам на нашите навивачи – клубот не сакаше да го продаде Рајс. Сакавме да изградиме тим околу него, му понудивме подобри услови од оние што ги имаше претходно. Но, тој јасно кажа дека сака да оди, дека му треба предизвик. После тоа почувствувавме дека не е во ред да го запреме на патот, па му дозволивме да си оди – рече претседателот на Вест хем, Дејвид Саливан.

Рајс го имаше своето деби за Вест хем против Барнли во 2017 година. Тој одигра 245 натпревари, последниот во Прага кога Вест хем во финалето на Конференциската лига ја совлада Фиорентина со 2:1 и по 43 години освои европски трофеј.