Ракометарите на Вардар денеска (17.30 часот) ќе се обидат да го поправат впечатокот од првиот натпревар во СЕХА Лигата кога загубија и ќе се обидат да ги запишат првата победа и бодови.

„Црвено-црните“ загубија од Нексе во првото коло во СЕХА Лигата и денеска и гостуваат на Војводина и повторно ја имаат улогата на фаворит. Но, новиот тренер на вардарци, Давид Дејвис предупредува дека неговите ракометари ќе мора да одиграат подобро отколку на првиот натпревар доколку сакаат да победат.

– По поразот од Нексе, мораме да одиграме подобро против Војводина. Да, бевме подобри против Пролет, но ние треба да продолжиме да работиме, со игра на теренот и очекувам да биде подобро во вторник. Војводина игра дисциплинирано, опасноста доаѓа од Немања Прибак, другите повеќе играат со него, а имаат и добар голман. Војводина кога игра дома е многу опасна. Рано е да се зборува дали имаме напредок во нашата игра, ќе видиме понатаму. Имаше разлика во дуелот со Пролет, ракометарите знаеја што мора да играат и мислам дека ова им влезе во глава. Чекор по чекор мислам дека ќе биде подобро – вели Дејвис.