Вардар им се врати на победите во СЕХА лигата
После вториот триумф во Лигата на шампионите во неделата против Порто, вечерва во СЦ „Јане Сандански“, Вардар им се врати на победите во СЕХА Газпром лигата откако со резултат 27:25 славеше против Нексе.
После изненадувачкиот пораз во минатото коло во Украина од Мотор Запорожје, овојпат не дозволија ракометарите на Давид Писонеро повторно да бидат изненадени.
Повторно во главна улога беа оние стандардните, а на овој меч минутажа добија и помладите во самиот финиш. Хрватите се покажаа како цврст противник, иако дури во последните 10 минути беше скршен нивниот отпор и на крајот мораа да се помират со поразот.
Најзаслужни за победата беа Дибиров со девет голови, три помалку запиша Дисингер, а добра партија покажа и голманот Гедбан кој забележа 15 одбрани. После три меча во групата А, Вардарци моментно се на делба на првото место по шест бода заедно со Мотор Запорожје и Војводина.
Сега „црвено-црните“ се фокусираат на третата пресметка во ЛШ, поточно во Украина против Мотор Запорожје против кој ќе се обидат да се реваншираат за поразот во СЕХА на 29 септември (недела, 18.00 часот).