Како подготовка за новата натпреварувачка сезона 2021/2022 денеска екипите на Вардар и Победа одиграа пријателски натпревар кој заврши нерешено 1:1.

Поранешни шампиони, а сега второлигашки клубови одлучија да ги одмерат силите пред лигашките предизвици. Пред повеќе од 2000 илјади гледачи на стадионот „Гоце Делчев“ – Прилеп го одиграа својот контролен меч играчите на Вардар и Победа.

По 1903 денови од последниот одигран натпревар во прилепскиот храм на фудбалот (на 14 мај 2015 година со Велазерими 2:0) и 160 одиграни првенствени и куп натпревари надвор од својот терен изминативе повеќе од пет години, ФК Победа се враќа во својот дом-на Градскиот стадион „Гоце Делчев“.

Мечот инаку започна со едноминутно молчење во чест на неодамна починатите: долгододишниот прв човек на Победа Александар Забрчанец, поранешниот голман и капитен на Победа Гоце Груевски и навивачот Сотир Илиески.

Се играше како да е тоа меч за бодови, тврдо, машки, агресивно со доста дуел игра, со остри стартови за кои имаше и доста жолти картони. Сето она што фудбалот го прави машка игра на два тима кои сакаат да победат. Иако имаше игра надвор од казнетиот простор на младиот вардаров голман Стојковски, за што доби црвен картон, по инсистирање на тренерот на Победа Крстески гостите сепак продолжија со 11 играчи од 36 минута до крајот.

Вардар поведе во 31 минута преку Стојкоски по прекин од корнер, а Победа израмни со евро-гол од слободен удар на Дарко Ангелески во 37 минута.