УЕФА: Одлуката на судот не значи одобрување на Суперлигата
Европската фудбалска унија (УЕФА) се огласи по одлуката на Европскиот суд на правдата за формирање на „Суперлига“.
– Оваа одлука не значи одобрување или потврдување на таканаречената „Суперлига“. Тоа само го нагласува историскиот недостаток во рамката за претходно овластување на УЕФА, технички аспект веќе признаен и разгледан во јуни 2022 година. УЕФА останува одлучна во својата посветеност да ја поддржи европската фудбалска пирамида, обезбедувајќи таа да продолжи да им служи на пошироките интереси на општеството – пишува УЕФА.
Потоа, од европската куќа на фудбалот објаснуваат кој е планот:
– Ќе продолжиме да го обликуваме европскиот спортски модел заедно со националните федерации, лиги, клубови, навивачи, играчи, тренери, институции на ЕУ, влади и партнери. Веруваме дека европската фудбалска пирамида заснована на солидарност, која навивачите и сите актери ја прогласија за нејзин незаменлив модел, ќе биде заштитена од заканата за отцепување со европските и националните закони – стои во пораката на УЕФА.
Концептот на Суперлигата сè уште не е целосно дефиниран, но шпанските медиуми „Марка“ и „Мундо Депортиво“ објавија некои детали.
„Марка“ пишува дека планот е Суперлигата да биде отворена, што го кажа и претседателот на Реал Мадрид, Флорентино Перез, а во неа да играат 60 клубови во различни рангови.
