Уапсени осомничените за убиството на новинарка во С.Ирска (ВИДЕО)

Фото: Принтскрин/Youtube

Уапсени се двајца тинејџери во врска со убиството на северноирската новинарка Лира МекКи во Лондондери, соопшти полицијата. Двајцата мажи на возраст од 18 и 19 години се задржани во Лондондери согласно антитерористичките закони и се одведени во Белфаст на распит, соопшти локалната полиција.

МекКи (29) беше погодена од куршум додека известуваше од протест во Лондондери во четвртокот навечер.

Локалната полиција вчера соопшти дека се сомнева оти за тоа е одговорна „Нова ИРА“ (Ирската републиканска армија). Помошникот началник на полицијата Марк Хамилтон вчера изјави дека полицијата случајот го третира како „терористички инцидент“.

Во времето на инцидентот, републиканците на полициските возила фрлале запаливи бомби, а во еден момент се чул истрел од огнено оружје. МекКи стоела во близина на полициското возило со други новинари. Надзорните камери ги снимиле нејзините последни моменти во масата народ, а на снимки од мобилни телефони се забележуваат сомнителните напаѓачи.

Полициската служба на Северна Ирска соопшти дека стрелец пукал кон полициските службеници во четвртокот, околу 23 часот. На снимката се гледа маскиран напаѓач како се потпира и се чини дека пука кон полицајците и набљудувачите, па се претпоставува дека таа е убиена од залутан куршум.

Нова ИРА е група републиканци кои го отфрлаат Договорот склопен на Велики петок во 1998 година. Со тој договор, ИРА прифати политичко решение за ставање крај на долгогодишните насилства, во кои загинаа над 3.700 луѓе. Во последните месеци се забележува зголемување на тензиите во Северна Ирска.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот