Турското Министерство за правда планира да развие системи за препораки базирани на вештачка интелигенција (ВИ), како дел од модернизацијата на судскиот систем, што ќе служи како поддршка за судиите и обвинителите во процесот на донесување одлуки, според „Годишната претседателска програма за 2026 година“.

Како што објави агенцијата Анадолу, целта е да се зајакне дигиталната инфраструктура на судството, да се подобри ефикасноста на судските процеси и да се зголеми довербата на граѓаните во системот. Новиот софтвер за Судскиот информациски систем (UYAP) ќе биде завршен и усогласен со современите технологии и стандардите за сајбер безбедност.

Надлежното министерство, покрај воведувањето на решенија за вештачка интелигенција, ќе спроведе студии за етичките и правните рамки на нивната примена, додека вештачката интелигенција ќе се користи и во форензичките услуги.

Како дел од реформата, дисциплинските постапки против судии и обвинители ќе бидат ревидирани за да се зајакне независноста и транспарентноста на судството.

Сите одлуки во дисциплинските процеси ќе бидат достапни во рамките на заштитата на личните податоци, а ќе бидат земени предвид и претходните одлуки што поставиле преседан, објавува Танјуг- пренесе Политика.

Програмата предвидува и зголемување на ефикасноста на системот за вештачење, преку обука и стандардизација на услугите, како и проширување на практиката на приватно вештачење. Ќе бидат развиени и алтернативни методи за решавање на спорови за да се намали товарот врз судовите и да се забрза решавањето на случаите, а воедно ќе продолжат кампањите за подигање на свеста за важноста на доброволната медијација.