Доналд Трамп кој ги загуби изборите во САД и не успеа да освои реизбор на претседателската позиција има намера да продолжи да шири неосновани обвинувања за измама на гласачите на претстојните митинзи, наведуваат извори од Белата куќа за „Аксиос“.

Трамп и неговите сојузници продолжуваат да изнесуваат неосновани обвинувања за масовна измама на гласачите, откако водечките светски медиуми објавија во саботата дека Џо Бајден е новоизбран претседател на Соединетите американски држави.

Аксиос повикувајќи се на извори од Белата куќа, тврди дека планот на Трамп е да ја пропагира идејата дека мртви луѓе гласале на изборите. Неоснованите извештаи за гласање на мртви луѓе започнаа брзо да се шират на Интернет по изборите и беа нагласувани од Трамп и други истакнати републиканци.

Во еден момент по изборите, на социјалните мрежи се прошири дезинформација дека во Пенсилванија имало дури 21 000 гласови од починати лица. Ова на Твитер го сподели и личниот адвокат на Трамп, Руди Џулијани. Њујорк Тајмс разоткри дека станува збор за дезинформација.

Во друг случај, синот на претседателот Доналд Трамп јуниор сподели твит за дека во Мичиген наводно е признаен глас на мртов човек. Инсајдер и Тајмс набрзо разоткрија дека станува збор за дезинформации. Гласот му припаѓал на синот на починат маж, односно таткото и синот делеле исто име.

Иако сè уште нема докази за голема изборна измама, Трамп не престанува да ја пропагира ова идеја и по изборите.

Тој исто така покрена неколку тужби во државите кои ги одлучија изборите како Мичиген, Пенсилванија, Аризона, Џорџија и Невада. Повеќето се однесуваат на броењето на гласачките ливчиња, и наводно планира да побара повторно пребројување во некои држави, вклучувајќи го и Висконсин.

Во балканските земји, а посебно во Македонија во сите претходни изборни турнуси има реакција за непречистениот избирачки список на кој со години остануваат неизбришани гласачи и по својата смрт што секогаш ги доведува во прашање резултатите на некои избирачки места, но и на изборите во целина.