Американскиот претседател Доналд Трамп се откажал од извршување воен удар врз Иран, откако бил предупреден дека интервенцијата може да доведе до уште една долга и исцрпувачка војна на Блискиот Исток, објави британскиот весник „Дејли меил“.

Според извори, Трамп претходно оваа недела ги предупредил иранските власти дека САД се „подготвени“ за акција и ги повикал иранските граѓани да продолжат со демонстрации, со порака дека „помошта доаѓа“. Краткото затворање на иранскиот воздушен простор во средата ги зголемило стравувањата дека нападот е неизбежен.

Сепак, советниците на Трамп, како и американски, израелски и арапски официјални лица, го убедиле да се воздржи, наведувајќи ја неизвесноста околу исходот, ризикот од долготрајна нестабилност и потенцијалните негативни последици за регионалните сојузници. Иако претседателот призна дека се „убедил себеси“ да не нападне поради откажаните егзекуции на демонстрантите, тој го оставил можноста отворена за идни дејства.

Висок свештеник во Иран продолжил да бара смртна казна за притворените демонстранти, а суровата репресија довела до смирување на протестите кои започнале на 28 декември поради економската нестабилност. Американската агенција „Активисти за човекови права“ проценува дека во репресијата загинале околу 3.090 луѓе.

Одлуката на Трамп за одложување на нападот остави чувство на разочараност кај демонстрантите и ја стави довербата во американската поддршка на коцка, според експерти за Блискиот Исток.