Целиот износ на кауцијата што Врховниот антикорупциски суд на Украина (ВАКС) претходно ја одреди за опозициската пратеничка и поранешна премиерка Јулија Тимошенко е платен, соопшти денеска тој суд, пренесе „Политика“.

Прес-службата на ВАКС исто така информираше дека разгледувањето на жалбата на Тимошенко против одлуката на првостепениот суд за нејзината превентивна мерка ќе започне в понеделник, на 26 јануари, пренесува Униан.

Тимошенко потврди дека целосниот износ на нејзината кауција, во висина од приближно 655.000 евра, е платен, во објава на Фејсбук.

Високиот антикорупциски суд на Украина (ВАКС) ѝ одреди превентивни мерки во форма на јемство во износ поголем од 33 милиони гривни (приближно 655.000 евра) на претседателката на пратеничката група „Баткившчина“ (Татковина) и поранешна премиерка на Украина, Јулија Тимошенко, во предметот што се води против неа поради сомнение за поткуп во врска со гласање во украинскиот парламент – Врховната рада.

Покрај јемството, судот ѝ наложи на Тимошенко да се јавува на секој повик на Националното антикорупциско биро (НАБУ) и на судот, да не ја напушта територијата на Киев и Киевската област, да не комуницира со одреден број пратеници во врска со истрагата, како и да го предаде пасошот, пренесуваат украинските медиуми.

Лидерката на партијата „Баткившчина“ најави дека ќе поднесе жалба против одлуката на ВАКС до апелациониот суд.

НАБУ и Специјализираното антикорупциско обвинителство (САП) на 13 јануари соопштија дека поднеле обвинение против народната пратеничка и претседателка на партијата „Баткившчина“ поради сомнение дека им нудела мито на пратеници од други фракции за гласање за или против одредени законски предлози.

Ден подоцна, Тимошенко го потврди претресот на партиското седиште и ги отфрли, како што наведе, „апсурдните обвинувања“, оценувајќи дека истрагата е политички мотивирана.