Ракометарите на Тинекс Пролет ја забележаа и втората победа од стартот на плејаут натпреварувањето откако денеска ја оправда фаворитската улога против Струга, со триумф од 31:25.

Глигоров го постигна првиот гол во фуриозниот почеток на домашниот тим и раното водство од 4:1. Гостите намалија на 4:3, а потоа одржуваа некаква резултатска неизвесност само до 7:6.

Тогаш Тинекс Пролет предводен од Стоилевски (четири гола) направи серија од 5:0 за нова поголема предност од 12:6. Следеше мало опуштање кај Тинекс Пролет, што противникот го искористи за да намали на 15:12, но сепак на одмор се замина со 16:12 по голот што го постигна Василевски.

Тоа беше најава за фуриозниот почеток на второто полувреме во кое за нецели осум минути Тинекс Пролет стигна и до двоцифрено водство, кога Давитковски погоди за 23:13. Победникот практично беше решен на повеќе од 20 минути до крајот, па избраниците на тренерот Мајнов во остатокот од мечот рутински го приведоа дуелот до крај, славејќи со конечните 31:25.

Голманот Трајков имаше 11 успешни интервенции, додека во нападот најефикасни на Тинекс Пролет беа Палевски со девет, Стоилевски со седум и Давитковски со пет погодоци. На спротивната страна Наум Костов запиша седум, а Филип Мечкаровски пет голови.