Полицијата вчера приведе двајца тинејџери од Романија кои краделе во златарница во центарот на Скопје.

Како што соопшти МВР, 19-годишните В.Л.П. и Ф.И.П. биле уапсени, откако претходно влегле во златарницата во трговски центар на подрачјето на Центар во Скопје и побарале да разгледаат златен накит, а откако била извадена футрола, насилно ја зеле од вработената и побегнале.

-Вчера во 12:10 часот во трговски центар на подрачјето на Центар во Скопје, полициски службеници од Единицата за интервентна полиција при СВР – Скопје ги лишија од слобода В.Л.П.(19) И Ф.И.П.(19), двајцата од Романија, поради сомнение дека извршиле кражба во златарница во трговскиот центар – се вели во соопштението.

На излез од трговскиот центар се фатени и уапсени, а кај нив се пронајдени 43 парчиња златен накит. Одземеното е вратено во златарницата, а по целосно документирање на случајот, против нив ќе следува соодветна пријава.