ТФТ последен учесник во плеј-офот, МЗТ Скопје со триумф над Пелистер го потврди првото место
Кошаркарите на ТФТ продолжуваат со одличните игри сезонава и по триумфот во Купот на Македонија, денеска со победата над Гостивар од 87:80 си обезбедија и учество во разигрувањето за титулата.
ТФТ во полуфиналето од плеј-офот ќе игра против најдобриот тим во Суперлигата, МЗТ Скопје, додека во второто полуфинале ќе се сретнат Пелистер и Еуро Никел.
Предводник на ТФТ беше Александар Костоски кој постигна 36 поени, додека Морган даде двојно помалку.
МЗТ Скопје со триумф на гостувањето кај Пелистер од 79:88 го потврди првото место на табелата пред стартот на плеј-офот. Првото полувреме заврши со предност на „металците“ од 40:48 за на стартот од третиот дел Рикиќ со четири поени по ред, да донесе двоцифрена предност (40:52). Предноста се зголеми и на 17 поени (48:65), но битолчани во последната четвртина се приближија на седум поени негатива (66:73). МЗТ Скопје одговори со серија од 0:9 и ги реши дилемите околу победникот.
Војдан Стојановски го предводеше МЗТ Скопје со 16 поени, Адем Мекиќ даде 14, а Рикиќ и Ајви постигнаа по 12 поени, додека во редовите на Пелистер, Малешевиќ и Крстајиќ беа најпрецизни со по 17 поени.