Танкоски: Имаме големи шанси во Диселдорф, фаворити сме против Мотор Запорожје
Денеска од 18.45 часот составот на Еурофарм Пелистер ќе го игра својот четврти натпревар сезонава во ЕХФ Европската лига, а противник е Мотор Запорожје.
Поради руската агресија врз Украина, Мотор Запорожје ќе биде домаќин на македонскиот вицешампион во германскиот град Диселдорф.
Ова е шанса за играчите на тренерот Ларс Валтер да им се вратат на победите, ривалот до сега има три порази, а битолчани со учинок од една победа и два порази.
Добра вест за Валтер е враќањето на Тунижанецот Усама Хосни кој ќе биде во составот, но за очекување е дека нема да има преголема минутажа.
– Натпреварот против Мотор за нас е многу важен, бидејќи со нив ќе водиме битка за продолжување во следната фаза. Се подготовуваме за противникот од Украина, претежно составен со украински ракометари, но мислам дека ние сме фаворити и имаме големи шанси да се радуваме. Останаа таму само украински ракометари, со 2-3 странци. Високи и спори се и треба да ги наттрчаме, да играме наш ракомет и верувам дека нема да имаме проблем.
Имаме многу повредени ракометари, Суси веќе е опериран и се рехабилитира, Руди Сери мислам дека е загубен за оваа сезона. Имаме проблеми со ротација и мора да играме исти ракометари, 10 играчи се здрави и за македонско првенство и за Европската лига. Посебно е напорно овие дваесеттина дена до крајот на полусезоната, бидејќи имаме два натпревари неделно. Мора да се собереме, заедно да смогнеме сили, да ги издржиме овие дваесет дена и ќе биде сè во ред – вели ракометарот на Еурофарм Пелистер, Марио Танкоски.
ЕХФ Европска лига 2022/2023
Група „Д“
Четврто коло, двојки –
18.45 часот Мотор Запорожје – Еурофарм Пелистер
18.45 часот Скандерборг Архус – Бидасоа Ирун
20.45 часот Фуксе Берлин – Агуас Санташ
Табела:
1. Фуксе Берлин 6 бодови
2. Скандерборг Архус 6
3. Бидасоа Ирун 4
4. Еурофарм Пелистер 2
5. Агуас Санташ 0
6. Мотор Запорожје 0