Тамше: Вардар е двократен европски шампион, ќе влеземе во мечот со голема почит
Во вторник со почеток од 20.15 часот во СЦ „Јане Сандански“ – Скопје ќе се игра четвртфиналниот натпревар помеѓу Вардар 1961 и Нексе за пласман на Фајнал-фор турнирот во СЕХА Газпром лигата.
Победникот од овој меч во полуфиналето во Задар ќе игра против екипата на ППД Загреб кој претходно ја елиминираше Војводина.
Стратегот на „црвено-црните“, Владо Недановски вели дека Нексе е добар тим, а пред навивачите ќе се обидат неговите играчи да извлечат поволен резултат.
Пофалби има и тренерот на хрватскиот клуб, Бранко Тамше за екипата на Вардар, но и дека неговите ракометари ќе го дадат максимумот за да игра на завршниот турнир во Задар.
– Во вторник ќе играме со двократен европски шампиони, што значи дека сигурно ќе влеземе во натпреварот со многу почит, но и решени да покажеме за што сме способни. Имавме многу добри и лоши моменти на подготовките, но се надевам дека во вторник ќе бидеме најдобри кога ќе биде најважно. Целта е секако да се обезбеди пат до Задар. Кога станува збор за повредите, нема да можеме да сметаме на сите играчи во Скопје, но сигурен сум дека тие кои се на располагање ќе го дадат максимумот и обезбедиме победа – вели Тамше.