Светската здравствена организација официјално го прогласи крајот на епидемијата на хантавирус што беше регистрирана на патничкиот брод „МВ Хондиус“. Одлуката е донесена откако подолг период не биле потврдени нови случаи и откако биле исполнети условите за завршување на здравствената вонредна состојба, објави Ројтерс.

Епидемијата првично била откриена кај патници на крстосувачки брод што пловел низ јужниот Атлантик. Неколку патници развиле сериозни симптоми, а кај дел од нив болеста завршила со смртен исход. Случајот предизвика меѓународна тревога бидејќи станувало збор за невообичаено ширење на вирус во затворен бродски систем, што претставува ретка епидемиолошка ситуација.

Според податоците на СЗО, биле идентификувани и следени десетици контакти во повеќе земји. Најголем дел од лицата го поминале периодот на медицински надзор без да развијат симптоми. Здравствените власти нагласуваат дека вирусот не се пренесува лесно од човек на човек и дека ризикот за пошироката популација останува низок.

Епидемијата била ставена под контрола со строги мерки за изолација, следење на патниците и епидемиолошка анализа. Експертите на СЗО најавија дека случајот ќе биде детално разгледан за подобро да се разбере преносот на вирусот во затворени средини, како што се бродовите.

Иако кризата официјално е завршена, здравствените власти продолжуваат да предупредуваат дека ваквите настани бараат брза реакција и меѓународна координација, особено во услови на глобални патувања и крстосувачки туризам.

Заврши карантинот: речиси сите патници од крузерот погоден од смртоносниот хантавирус се враќаат дома