Македонската кошаркарска репрезентација триумфираше против Ирска со 77-56 во Скопје и избори пласман во следната фаза од претквалификациите за Евробаскет 2029.

И покрај проблемите со комплетирањето на екипата, нашите кошаркари ја надминаа Ирска, а натпреварот против Луксембург на гости, кој е закажан за недела, ќе претставува само формалност. Македонија со максимален учинок ќе продолжи во втората фаза, додека Луксембург моментално е втор во групата А, пред Ирска и Азербејџан.

Ирците имаа предност само на почетокот на натпреварот со 2-6, но сè потоа беше во боите на нашата репрезентација. Првата четвртина заврши со 23-16, во полза за Македонија, продолживме со добра игра и во втората, за на паузата нашите да заминат со водство од 11 поени, 38-27. Избраниците на Берокал уште повеќе се разиграа во второто полувреме, а кулминацијата беше водството од 26 поени во средината на последната четвртина. Ирците пред крајот успеаја да намалат на 16 разлика, но нашите кошаркари возвратија за конечни 77-56.

Крилниот кошаркар на Тренто, Андреј Јакимовски беше најефикасен во редовите на нашата репрезентација, забележа „дабл-дабл“ учинок со 19 коша и 13 скока, а додаде и две асистенции. Виктор Ефремовски постигна 12, Војдан Стојановски 10, додека пак натурализираниот Македонец Дивејн Стјуарт имаше седум поени и девет скока, но и се повреди.

Кај Ирците најдобар поединец беше Алајики со 20 коша.