Совршено тирамису: Тајната е во маскарпонето
Традиционално тирамисуто се подготвува од свежи јајца, крем-сирење маскарпоне, кафе и пишкоти, но денес има и различни рецепти со јагоди, лимон дури и тиква. Подготовката не е комплицирана, но во секој чекор треба да обрнете внимание на детали, за да добиете фантастичен резултат.
1. Пишкотите не ги топете – доволно е секоја пишкота едноставно да ја брцнете во кафето и веднаш да ја извадите. Не треба да ги киснете. Можеби ви се чини дека тоа е малку и дека нема да впие од вкусот на кафето, но верувајте дека не е така, а пишкотите ќе го задржат својот облик.
2. Алкохолот можете да го прескокнете – иако ретко кој се буни на неколку капки алкохол во слатките, има луѓе кои не го сакаат. Тирамису можете да направите и без алкохол, вкусот нема да му се смени. Сепак каков и да правите тирамису, напомнете им на гостите дали во него има или не алкохол.
3. Тајната е во маскарпонето – има неколку видови крем-сирења кои се користат за подготовка на тирамису, но за најдобар вкус сепак е потребно маскарпоне. Иако станува збор за малку поскапо крем-сирење, сепак вкусот во комбинација со пишкоти и кафе е незаменлив.
4. Какаото е задолжително – откако ќе го наредите тирамисуто, не заборавајте го какаото. Посипете со обилен слој какао на површината од десертот и тоа со помош на цедилка, за да не останат грутки. Ако немате какао можете да ставите рендано чоколадо.
5. Нека отстои во фрижидер – готовиот десерт задолжително треба да отстои неколку часа во фрижидер за да се соединат вкусовите. Најдобро е ако остане во фрижидер преку ноќ.
Во продолжение погледнете го видеото како да направите оригинално италијанско тирамису, по рецепт на познатиот готвач Џенаро Конталдо.