Облечена како божица, претопена во автентичниот амбиент на Сули ан, поп-пејачката Антониа Гиговска ги собра медиумите и фановите со цел да го промовира својот втор албум насловен „Жена“.

– На овој албум работевме напорно и со многу љубов. Ќе има девет песни. Интересно е што секоја е различна и не наликува на другата. Тоа ни беше и целта. Преку овие песни сакам да ѝ порачам на секоја жена дека е храбра сама по себе и дека не ѝ треба маж за тоа – вели Гиговска.

За секоја песна ќе има и оригинален видеозапис, открива пејачката.

– Снимавме на различни локации низ Македонија. Мислам дека ќе ви се допаднат спотовите – рече таа.

За овој албум многу наскоро се очекува и голем концерт, најави Гиговска, без да открива детали.

Ексклузивно за „Слободен печат“ одговори на прашањето кога таа станала жена.

– Кога се реализирав како мајка, почувствував дека станав жена – вели Гиговска.

Пејачката досега објави дел од композициите што ќе се најдат на овој албум: „Специјалиста“, „Аман“, „Чукај, чукај“, а носечката песна на албумот, „Жена“, веќе доби и награда на фестивалот „Макфест“ за најслушана песна помеѓу два фестивала.