Македонската репрезентативка и членка на танцовиот клуб „Брејк а лег“ од Скопје, Мила Србиноска, деновиве постигна огромен успех. На Европското првенство во хип-хоп, попинг, брејкинг и ол стајл батлс, кое се одржа од 1 до 7 јуни во Клагенфурт, Австрија, Србиноска го освои својот втор сребрен медал.

По претходно освоеното сребро во дисциплината ол стајл батлс, таа се закити со уште еден сребрен медал во категоријата хип-хоп соло, јуниори 2, каде што се натпреваруваше во исклучително силна конкуренција од 110 учесници од цела Европа.

Со двата освоени сребрени медали на едно Европско првенство, Србиноска оствари резултат без преседан за македонскиот хип-хоп. Таа стана првиот македонски натпреварувач што освоил два медали на едно Европско првенство во овие дисциплини, поставувајќи нов рекорд во историјата на македонските настапи на европските хип-хоп шампионати.

„Пресреќни сме за резултатите кои Мила ги демонстрираше на ова Европско првенство. Овие медали се резултат на многу посветеност, дисциплина и напорна работа. Горди сме на Мила и на начинот на кој ја претставува Македонија на меѓународната сцена. Пред нас има уште една категорија во која настапуваме и се надеваме дека ќе продолжиме со добрите резултати“, изјави Трајче Петковски од „Брејк а лег“.

Мила Србиноска е едно од најголемите имиња во историјата на македонскиот хип-хоп. Во 2017 година ја освои титулата европски шампион, а во 2024 година стана светски шампион, испишувајќи историја за македонскиот танц. Минатата година беше и финалистка на Светското првенство во хип-хоп, а двата сребрени медали освоени во Клагенфурт се уште една потврда за нејзината светска класа и континуитетот на врвни резултати на најголемата европска сцена.

Зад успесите на Мила стои нејзиниот долгогодишен тренер и ментор Андријана Петковски, која со својата посветеност има значајна улога во развојот на една од најуспешните македонски танчерки.