Словенечкиот премиер Марјан Шарец денес изјави дека Словенија е подготвена и да ги затвори границите ако се зголеми ризикот за влез на коронавриусот во земјата, јавуваат словенечките медиуми, а пренесува „Индекс“.

– Поради ширењето на коронавирусот Словенија ќе ги затвори границите ако тоа е потребно, односно ќе ги спроведува мерките кои се соодветни и одговараат на состојбата – рече Шарец за новинарите.

Според зборовите на словенечкиот премиер во оставка, словенечката влада и здравствените институции дневно ги следат настаните поради веројатниот ризик дека вирусот може да се појави во Словенија.

Постојат и сценарија за понатамошни активности, па и ангажирање на цивилната заштита и полицијата ако дојде до поголема бројка на заболени, но сите тие мерки треба да се применат во однос на тоа како ќе се развива ситуацијата.

Здравствените власти денес потврдија дека вкупно 13 луѓе досега во Словенија се тестирани за новиот коронавирус и сите тестови покажале негативен резултат.

Во таканаречен домашен карантин се два пара на партнери кои минатата недела во татковината се префрлени од крузерот „Дајмонд принцес“, а претходно спроведуваните тестови и во Јапонија и во Словенија покажаа дека не се разени. Добро се чувствуваат и немаат симптоми на болеста.