Дигиталните номади се луѓе кои користат телекомуникациски технологии за да заработат и да живеат номадски живот. Овие индивидуи ги користат сите придобивки, работејќи од странски земји, кафулиња, библиотеки, па дури и возила за рекреација.

Благодарение на повеќе од 35 милиони дигитални номади, кои постојано ја менуваат својата локација на живеење и работење, туристичката индустрија и популарноста на местата кои претходно биле непознати за патниците е во постојан раст.

Како што пишува американската веб-страница „Travel off path“, Балканот е регион, кој неодамна забележа огромен раст со туризмот и посетата на дигиталните номади. Земјите како што се Албанија, Србија, Црна Гора и Бугарија имаат добри причини, поради кои им се зголемува популарноста, кај овие работници од далечина.

Меѓу овие земји „Travel off path“, ја наведува и Македонија, како помалку позната земја која бележи огромен пораст на дигитални номади. Опишана како земја со многу уникатно и често оспорувано минато, се вели дека Македонија е една од најмалку посетуваните земји во Европа, и иако ужива во туристичката и дигиталната номадска посетеност, сепак на листата е далеку под другите европски земји.

Но, последните податоци споделени од „Номад лист“, откриваат дека Скопје е вториот најбрзо растечки дигитален номадски центар во последните пет години, со импресивен раст од 417 отсто на годишно ниво од 2018 година.

Еве неколку причини зошто Скопје е одлично за дигиталните номади, кои „Travel off Path“ ги наведува:

Евтино

Едно за кое сите странци се согласуваат е дека Скопје е евтин град.Како една од најевтините земји во Европа за дигитални номади, Македонија е идеална за работниците од далечина, кои сакаат да заштедат многу пари. Во нашиот град се нудат поскапи, квалитетни апартмани со поглед на планина, но и станови со многу пристапни цени. Во просек, овде може да се најде сместување многу поевтино отколку на кое било место во Европа.

Безбедно и гостопримливо

Скопје изобилува со пријателски расположени локални жители, кои обично се многу среќни кога гледаат странците како уживаат во нивната земја. Градот е високо рангиран по безбедност во споредба со многу други европски градови. Се вели дека соло-патниците може безгрижно да се движат низ улиците на градот, дури и во ноќните часови. Се разбира, важат нормални мерки на претпазливост, и има области што треба да ги избегнуваат.

Добра инфраструктура и поврзаност

Иако, во Македонија сè уште не е воведена дигитална номадска виза, се очекува тоа да се регулира кон крајот на оваа година. Но, на жителите од многу земји, вклучувајќи ги САД и Обединетото Кралство, им е дозволено да престојуваат до три месеци без потреба од посебна виза. Скопје е поврзано со многу други градови во регионот преку автобуски линии, а аеродромот е добро опслужуван од нискобуџетни авиокомпании. Во однос на интернетот, Скопје е високо рангиран за брзината на интернетот кој се нуди, а сим-картичките се евтини и лесни за користење, што им овозможува на странците да останат поврзани.

Атрактивни знаменитости во близина на градот

Можеби Скопје не е место за љубителите на плажа, бидејќи не излегува на море, но има многу други знаменитости за посета и истражување. Популарен и забавен начин да поминете еден ден, без да одите предалеку од Скопје е прекрасниот кањон Матка, кој е одлично место за разладување во летниот период. Националниот парк „Маврово“, Тетово, селото Куклица и мегалитската опсерваторија Кокино се одлични места, за да се „избега“ од градот. За уживање во подолг одмор,  Охрид е секогаш вистинската локација. Како најстарото и едно од најдлабоките езера во Европа, Охридското Езеро не смее да се пропушти.

Македонија станува една од омилените локации за работење на дигиталните номади