Силекс денеска ќе го дознае противникот во Лигата на шампионите
Силекс од Кратово ќе го претставува македонскиот фудбал ова лето во квалификациите од Лигата на шампионите.
Денеска со ждрепка точно напладне во Нион ќе се дознае противникот на нашиот претставник, а УЕФА веќе ги објави и можните ривали.
Силекс не е меѓу носителите во групата „4“, а за ривал ќе добие една од следните екипи: Астана (Казахстан), Карабах (Азербејџан), Макаби Тел-Авив (Израел) или Динамо Тбилиси (Грузија).
Поради ситуацијата со Ковид-19, но и ограничувањето во патувањата, како што веќе се и најавува, можно овие натпревари да се играат на неутрален терен. Исто така наместо два мечеви, УЕФА донесе одлука да се игра по еден меч во квалификациите во ЛШ и Лигата на Европа.
Првото квалификациско коло во ЛШ е закажано на 18 и 19 август 2020 година.
