Штета: Пеналите кобни за Шкендија, АИК ќе игра во плеј-офот за пласман во Лигата на конференции
Фудбалерите на Шкендија не успеаја да се пласираат во плеј-офот за пласман во групната фаза во Лигата на конференции откако вечерва на Националната Арена „Тодор Проески“ во трилер реванш натпревар со АИК Стокхолм, загубија во пенал рулетот.
Двата натпревари во третото квалификациско коло завршија со идентични 1:1, а по продолженијата од 2х15 минути резултатот остана непроменет, по што патникот во плеј-офот се решаваше во пенал рулетот во кој како подобри пеналџии се покажаа фудбалерите на шведскиот тим.
Дури тројца фудбалери на Шкендија не погодија во пенал рулетот, Дита, Дориев и капитенот Хасани кој во регуларниот дел од натпреварот беше прецизен од белата точка. Прецизни изведувачи на пеналите беа само Стојановски и Цаке. Кај АИК, непрецизни беа само Ларсон и Ринг.
Претходно, во регуларните 90 минути, резултатот беше 1:1. Шкендија поведе со голот на Ферхан Хасани во 22 минута од пенал додека АИК израмни преку Ајари во 56 минута.