Шпанското обвинителство покрена истрага против Луис Рубиалес
Шпанското обвинителство соопшти дека отвори истрага против првиот човек на шпанската фудбалска федерација Луис Рубиалес за сексуална агресија, пренесува „Си-Ен-Ен“.
Рубиалес се најде во центарот на скандал откако ја бакна во уста репрезентативката на неговата земја Џенифер Хермосо по триумфот на Шпанија во финалето на Светското првенство во Австралија.
– Се договоривме да ја контактираме Џенифер Хермосо за да ја информираме за нејзините права како жртва на наводно кривично дело сексуална агресија во следните 15 дена – се вели во соопштението.
Рубиалес беше суспендиран од Светската фудбалска федерација во саботата, еден ден откако истакна дека нема да поднесе оставка. Исто така, управното тело на шпанскиот фудбал најави тужба поради лагите на Хермосо, која истакна дека со денови била под притисок да му даде поддршка на претседателот на Федерацијата.
Шпанската влада побара од Спортскиот суд да го суспендира Рубиалес, за што ќе се расправа во текот на денот. Исто така, шпанската фудбалска федерација свика состанок со регионалните федерации за да се разговара за ситуацијата во која се најде тоа тело.
При објавувањето на суспензијата за Рубиалес, ФИФА му наложи на него, на Шпанската фудбалска федерација, на официјалните лица и на сите вработени да не се ни обидуваат да контактираат со Хермосо.