Шпанија преку пеналите до полуфиналето на Евро 2020
Репрезентација на Шпанија е првиот полуфиналист на Евро 2020 откако во четвртфиналето ја елиминира Швајцарија по подобро изведување на пенали откако во регуларниот дел и по продолженијата беше 1:1 (3:1 на пенали). Овој пат статусот на херој му припадна на голманот на Шпанија, Унаи Симон кој одбрани два пенали на Швајцарците.
Сега фортуната не беше на страната на Швајцарците кои во осминафиналето ја исфрлија Франција и тоа во пенал рулетот, а денеска голманот Јан Зомер повторно беше во елемент, но затоа потфрлија „пеналџиите“.
Од друга страна, Шпанија конечно по 2012 година кога ја освои титулата на ЕП, за прв пат ќе игра во полуфиналето на едно големо натпреварување.
За 120 минути игра во Санкт Петербург немаше победник иако Шпанците доминираа на теренот посебно во продолженијата бидејќи противникот остана со играч помалку по директниот црвен картон на Фројлер.
„Фуријата“ поведе со автоголот на Дени Закарија во осмата минута, додека Швајцарија израмни во 68 минута преку Џердан Шаќири. Тој резултат беше актуелен и во продолженијата по што прашањето околу победникот и патникот во полуфиналето се решавање во пенал серијата.
Таму подобри беа Шпанците, постигнаа три гола преку Олмо, Морено и Ојарзабал, додека Швајцарците дадоа само еден (Гаврановиќ).
Шпанија во полуфиналето кое ќе се игра на „Вембли“ ќе игра со подобриот од дуелот Белгија – Италија.