Шкупи успешно ја реши ирската задача во Лигата на шампионите!
Денеска во прелиминарната рунда од футсал Лигата на шампионите Шкупи се пласираше во наредната фаза со триумфот од 3:0 против ирскиот првак Блу Меџик Даблин, односно се најде помеѓу 32 најдобри европски екипи.
Во првото полувреме составот од Чаир во СЦ „Борис Трајковски“ – Скопје дојде во водство со голот на Сефери реализиран од пенал во седмата минута. Претходно црвен картон кај гостите доби голманот Вина.
Предноста на македонскиот претставник беше зголемена во вториот дел со автоголот на бразилскиот интернационалец Соареш. Конечниот епилог беше поставен пред самиот крај на мечот, противничката мрежа ја затресе Незири.
За Шкупи ова беше само продолжување на успешната серија на добри резултати сезонава, до денешниот дуел имаше четири победи по ред во домашниот шампионат.
Дуелите од 1/16 финалето ќе се играат во периодот од 12-17 јануари 2021 година (ќе се игра само по еден натпревар поради коронавирусот). Жрепката ќе се одржи на 9 декември со почеток од 14.00 часот.