Екипата на Шкупи денеска го промовираше поранешниот фудбалер на Вардар, Али Адем, кој на Чаир доаѓа на позајмица од Арис.
Али Адем веќе им се приклучи на новите соиграчи во Анталија каде екипата се наоѓа на подготовки пред стартот на вториот дел од сезоната. Екипата на Шкупи есенскиот дел од сезоната го заврши на второто место со 33 бода, шест помалку од лидерот Шкендија.

– Несомнено сум многу среќен што дојдов во клуб со голема традиција во нашата земја и регионот. Секако, моето доаѓање во овој клуб е поврзано и со амбициите да му помогнам на тимот да стигне до шампионската титула и потоа да успее во Европа. Се надевам дека многу брзо ќе се прилагодам на ова големо семејство, имајќи во предвид дека од претходно сум играл заедно со Јакуп Бериша, Бесар Исени и Матеј Цветановски. Посакувам да дојдеме до шампионската титула сезонава и по долго време да го вратиме трофејот на Чаир – изјави Адем по промоцијата во новиот дрес.