На последниот лигашки натревар на клупата на тетовските „црвено-црни“, Артим Шаќири во неделата ремизираше на домашен терен против Македонија Ѓорче Петров (1:1).

Денеска од фудбалскиот клуб на Шкендија информираат дека е прекината соработката со шефот на стручниот штаб.

– Соработката со тренерот Шаќири е прекината со меѓусебен договор, сметајќи дека во овој момент е во најдобар интерес на двете страни. Во оваа прилика ФК Шкендија му се заблагодарува на Артим Шаќири за неговиот придонес во периодот додека го водеше „црвено-црниот“ тим и му посакуваме здравје и многу успеси во иднина – стои во соопштението на тетовскиот прволигаш.

Во новата сезона од Првата лига Шкендија во првите шест кола освои 11 бодови, колку и второпласираниот Силекс, а седум помалку зад водечката Струга. Во следното коло на 17 септември Шкендија е домаќин на актуелниот шампион Шкупи.

Шаќири летово ја водеше Шкендија и на меѓународната сцена каде помина две кола во квалификациите на Лигата на конференции, а во третото доживеа несреќна елиминација во пенал серијата против шведскиот АИК.

Ова е веќе трет отказ во македонскиот прволигашки фудбал и тоа за една неполна седмица. Вчера Ѓорѓе Стојчев ја напушти Академија Пандев, а пред пет дена Шкупи ја прифати оставката на Гоце Седлоски.