Шах: „Измамникот“ Ниман бара 100 милиони долари отштета од „клеветникот“ Карлсен
Светскиот шампион Магнус Карлсен отворено го обвини американскиот велемајстор Ханс Ниман дека победувал со измами, а овој бара отштета од најмалку 100 милиони долари
Американскиот велемајстор Ханс Ниман бара отштета од најмалку 100 милиони долари од светскиот шампион Магнус Карлсен, кој отворено го обвини младиот шахист дека победувал со измами.
Тужба доби и шаховскиот портал „chess.com“, кој објави извештај од експерти што докажуваат дека Ниман мамел на повеќе од 100 партии што ги одиграл преку интернет. Деветнаесетгодишниот велемајстор тврди дека Карлсен и порталот „се здружиле за да му ги уништат репутацијата и животот“.
Норвешкиот шампион Карлсен вчера не реагираше, а адвокатскиот тим на најпосетуваниот шаховски портал објави дека „обвинувањата се без основа“.
Ниман до неодамна важеше за еден од најголемите шаховски таленти и предводник на новата генерација млади велемајстори што може да му го загрози тронот на Карлсен.
Скандалот избувна во септември, кога Ниман го победи Карлсен во директно соочување, во партија во која според компјутерските анализи сите потези ги одиграл перфектно.
На следниот дуел Карлсен шокантно се предаде откако одигра само еден потег. Шампионот тогаш избегна директно да објасни зошто се предал без борба и изјави: „ако кажам, може да бидам во проблеми“.
Набрзо потоа, сепак, Карлсен отворено го обвини Ниман дека мамел и во директното соочување и многу пати претходно, а „chess.com“ по анализи на партиите објави дека младиот велемајстор тоа го правел повеќе од 100 пати.