Едноставно е невозможно да се помине животот без лоши денови. Без разлика дали се соочувате со негативно искуство, се соочувате со непосакувани промени или едноставно се будите во лошо расположение, тоа што не се чувствувате 100 отсто ментално или емоционално добро е голем дел од вашиот живот.

Како точно ќе изгледа еден лош ден за менталното здравје варира од личност до личност – некои луѓе може да се чувствуваат расеано, додека други може да се чувствуваат уморно. Без разлика како изгледа еден од тие тешки денови за вас, слободно може да се каже дека е непријатен. И сигурно не сакате да направите ништо за да го влошите и онака тешкиот ден, пишува „Хафпост“.

Дури и психотерапевтите имаат вакви денови – и има одредени работи што тие лично ги прават за да се грижат за себе кога ќе се случат. Прочитајте ги нивните совети:

Се грижат да им се задоволат физичките потреби

„Генерално започнувам со тоа каде се моите физички потреби и дали тие се задоволени тој ден“, рекла Ем Еванс, терапевт и ко-основач на групата „Андерстори“ во Пенсилванија.

Тоа може да значи правење буквален список на физички потреби, како: „Дали ги земав лековите? Дали пијам доволно вода? Дали спиев доволно? Дали јадев вистинска количина на храна за тој момент во денот? Дали го движев телото на начин што се чувствував добро?“

Ако не го снабдувате вашето тело со храна, вода и други потреби, не му правите услуга на вашето ментално (или физичко) здравје.

Ги одложуваат работите што не мора да ги прават тој ден

Кога имате тежок ден, добро е да не вршите дополнителен притисок врз себе – кој сака да има долг список на задачи кога е тешко дури и да станете од кревет?

Нат Адеј, терапевтка и ко-основач на групата „Андерстори“ во Пенсилванија, вели дека во денови на лошо ментално здравје, може да биде корисно да се процени што треба да се направи тој ден и што може да се одложи подоцна во неделата.

„Понекогаш да се биде продуктивен е само слој на стрес што не ни треба“, вели Адеј.

Пајал Пател, лиценциран брачен и семеен терапевт, вели дека не заборава да си даде благодат и се труди да ги заврши работите дури кога ќе се чувствува подобро.

Па, така здодевната задача во домаќинството може да почека и до следниот викенд, бидејќи некои тековени обврски нема да пропаднат ако ги одложите уште неколку дена кога ќе сте во подобро расположение.

Избегнуваат да носат големи одлуки

„Јас лично се обидувам да избегнам да донесувам големи одлуки, без разлика дали тоа е планирање патување со некого или донесување голема медицинска одлука. Ако не сум на вистинското ментално место во тој момент, нема да донесам никаква одлука што би можела да влијае на мојот живот во догледна иднина“, вели Адеј.

Ако не сте во добра позиција, на крајот би можеле да се согласите на нешто што навистина не сакате да го правите или да донесете одлука од вознемиреност и невнимателно размислување.

Излегуваат надвор

Познато е дека природата е добра за вашето ментално здравје. Истражувањата покажуваат дека престојот во природа може да ја зголеми среќата, а шетањето во природа во споредба со зафатената средина може да го намали стресот.

Терапевтот Пател советува доколку се чувствувате лошо секогаш сте во можност да излезете надвор.

„Брзо одење или дури и малку седење надвор многу помага“, вели таа.

Му даваат приоритет на движењето

Докажано е дека вежбањето може да ви помогне да се чувствувате помалку под стрес и може да ви помогне да се чувствувате подобро емоционално, па кога не сте расположени, добра идеја е да се движите.

„Многу верувам во движење на телото, и без разлика дали тоа е само одење на прошетка или јога или трчање и нешто малку поинтензивно, сметам дека движењето обично навистина помага да ми се постави денот во друга насока“, објаснува Адеј.

Дури и ако не можете да се мотивирате да го правите вашиот редовен тренинг или трчање, наместо тоа, обидете се да практикувате кратка прошетка или лесни часови за истегнување. Секое движење може да помогне.

Тие се поврзуваат со други луѓе – не на социјалните мрежи

Ем Еванс вели дека има навика да се изолира кога не се чувствува најдобро, што само прави да се чувствува уште полошо.

„И рака под рака со тоа се обидувам да ја ограничам мојата употреба на социјалните медиуми, бидејќи можам да се фатам во бесконечен циклус на разгледување низ социјалните мрежи што ме остава да се чувствувам исцрпено“, вели Еванс.

Лајкувањето на нечија фејсбук-објава не е исто како да седнете да разговарате за својот живот. Поради тоа, Еванс вели дека се обидува да вложи свесен и намерен напор да излезе и да се најде со пријателите и саканите.

Одмараат

„За време на деновите на лошо ментално здравје, се фокусирам на одмор колку што можам повеќе. Тоа може да значи нешто, од дремка до едноставно легнување на каучот за да го одмори телото“, вели Пател.

Таа објасни дека не сака да го присилува своето тело да прави нешто повеќе отколку што е способно.

Кога не се чувствувате добро, не треба да очекувате да бидете активни како и обично. Наместо тоа, треба да се потпрете на тишината, што на крајот може да ви помогне да заштедите повеќе енергија и да ги правите работите што сакате да ги правите.