Еден од најуспешните британски тенисери во двојки, Џејми Мареј, стави крај на својата богата професионална кариера, оставајќи зад себе импресивни резултати и бројни трофеи.

Мареј, кој е првиот Британец што се искачил на врвот на светската ранг-листа во конкуренција на двојки, последен пат настапи на турнирот во Њујорк минатото лето, по што реши да стави точка на долгогодишната кариера.

„Моето тениско патување завршува по 36 години“, напиша 40-годишниот тенисер на социјалните мрежи.

„Се чувствувам навистина среќен и привилегиран за сите неверојатни искуства што ми ги овозможи овој прекрасен спорт“, додаде тој.

Братот на Енди Мареј, кој остави длабока трага во сингл конкуренцијата, не заборави да им се заблагодари на најблиските за поддршката низ целата кариера.

„Им благодарам на мајка ми, татко ми, Енди, Але, Алан, Луис и Томас за неверојатната поддршка, трудот и жртвата во текот на мојата кариера, што ми овозможија да го постигнам максимумот во тенисот. Исто така и на сите останати кои ми помогнаа и ме поддржува, ви благодарам“, порача Мареј.

Во текот на кариерата, тој се искачи на првото место на светската листа во 2016 година, освои седум грен-слем титули во двојки и вкупно 34 турнири. Со репрезентацијата на Велика Британија, Мареј беше дел и од историскиот триумф во Дејвис купот во 2015 година.