Шпанскиот премиер Педро Санчез планира да покрене меѓународен прогресивен фронт за време на самитот во Барселона на 17 и 18 април, со цел да се спротивстави, како што рече, „на растот на крајната десница и политиките на американскиот претседател Доналд Трамп“.

Собирот, наречен „Глобална прогресивна мобилизација“, ќе се одржи во изложбениот комплекс Фира де Барселона, а организаторите очекуваат лидери од повеќе од 15 земји, објавија шпанските медиуми.

Шпанската влада смета дека овој настан треба да претставува „историска мобилизација за историски момент“ и можност за зајакнување на мултилатерализмот.

Меѓу најавените учесници се бразилскиот претседател Луиз Инасио Лула да Силва, колумбискиот претседател Густаво Петро, ​​јужноафриканскиот претседател Сирил Рамафоса и претседателот на Европскиот совет Антонио Коста.

Се очекува и градоначалникот на Њујорк, Зохран Мамдани, да се обрати на настанот преку видео врска.

Паралелно со овој собир, Барселона ќе биде домаќин и на состанок на латиноамериканските лидери како дел од 6-тиот состанок именуван „Во одбрана на демократијата“.

Своето присуство го потврдија и мексиканската претседателка Клаудија Шајнбаум и уругвајскиот претседател Јаманду Орси.

За време на нивниот престој во Барселона е планиран и билатерален самит меѓу Шпанија и Бразил, со кој ќе претседаваат Санчез и Лула да Силва.

На состанокот се очекува да бидат потпишани договори во областите на економијата, социјалната политика, иновациите, технологијата и дигиталната соработка, со учество на околу десет министри од секоја земја.