САД привремено ја запреа продажбата на оружје во вредност од 14 милијарди долари на Тајван за да се осигурат дека има доволно оружје за војна во Иран, изјави вршителот на должноста секретар на американската морнарица Хунг Цао. Неговата потврда на сослушувањето во Сенатот дојде само неколку дена откако претседателот Доналд Трамп делуваше неодлучно во врска со продажбата по средбите со кинескиот лидер Си Џинпинг, јавува Би-би-си.

Претседателската канцеларија на Тајван им соопшти на новинарите дека не добила никакви информации за прилагодувања на продажбата на оружје од страна на САД. Продажбата на оружје од САД на Тајван долго време е предмет на спор со Пекинг, кој самоуправниот остров го смета за своја територија и не ја исклучува можноста да го земе со сила.

„Засега ставивме сè на чекање за да се осигураме дека имаме муниција потребна за „Епски бес“, која ја имаме во изобилство. Само проверуваме дали имаме сè што ни треба, а продажбата на оружје на странски земји ќе продолжи кога администрацијата ќе смета за соодветно“, рече Цао на сослушувањето во четвртокот, користејќи го кодното име за заедничката американско-израелска воена операција во Иран.

На прашањето што слушнал од Тајванците за прекинот на продажбата, Цао рече:

„Не сум разговарал со Тајванците“.

Пакетот од 14 милијарди долари со месеци чека на одобрување од Трамп. Според извештајот на Ројтерс во март, тој вклучува ракети за воздушна одбрана, како што е системот PAC-3 на „Локид Мартин“, и ракетни системи земја-воздух. Трамп сè уште не потврдил дека ќе даде конечно одобрување, а минатата недела за „Фокс њуз“ изјави дека пакетот е многу добар адут за преговарање со Кина.

Трамп: Војната со Иран ќе заврши кога ќе почувствувам во коските

Тој, исто така, им рече на новинарите дека многу наскоро ќе донесе одлука. Коментарите дојдоа веднаш по претседателскиот самит во Пекинг, каде што Си му рече на Трамп дека Тајван е најважното прашање во односите меѓу САД и Кина.

Трамп подоцна им изјави на новинарите дека со Си детално разговарал за продажбата на американско оружје на Тајван, иако САД со гаранцијата до Тајван од 1982 година се обврзаа дека нема да се консултираат со Пекинг за ова прашање.

Трамп, исто така, објави дека ќе разговара за продажбата директно со тајванскиот лидер Лаи Чинг-тео, што е нагло отстапување од дипломатската традиција и веројатно ќе го налути Пекинг. Лидерите на САД и Тајван не разговарале директно со децении, иако Трамп разговараше со претходникот на Лаи, Цаи Инг-вен, кога тој беше избран за претседател.

Пекинг остро протестираше минатиот декември кога САД одобрија продажба на оружје од 11 милијарди долари на Тајван, еден од најголемите вакви пакети досега. Министерството за надворешни работи на Кина во тоа време изјави дека тоа ќе го забрза туркањето кон опасна и насилна ситуација во Тајванскиот теснец.

Од друга страна, тајванскиот лидер Лаи Чинг-те нагласи дека продажбата на оружје од САД е клучен фактор за одржување на регионалниот мир и стабилност. Под водство на Лаи, Тајван значително ги зголеми своите трошоци за одбрана како одговор на растечкиот воен притисок од Кина.

Советници на Трамп по посетата на Кина: Напад врз Тајван во следните 5 години